التعديلات الدستوريه

مبدئيا......
امبارح كنت مشتركه فى يوم الاغلاق للكمبيوتر 24 مارس
استفزتنى كلمة ياترى هتقدروا تستغنوا عن الكمبيوتر بتاعكم لمدة يوم واحد. طبعا انا مكدبتش خبر وقلت أكيد , وقفلته فعلا اليوم كله بس يا ساااااااااااااااااتر ده كان يوم غريب ومصدقت الساعه دقت 12 وجريت جرى عليه..
يلا ما عينا ......
امبارح بقى بما انى كنت مش لاقيه حاجه اعملها اعدت اتفرج على 90 دقيقه والعاشره مساء, الأتنين فى وقت واحد اقللب من ده أروح على ده وكلهم بيتكلموا فى موضوع واحد مفيش غيره
التعديلات الدستوريه
مبدأ السم فى العسل, يتاخدوا البيعه على بعضها يبلاش منها خالص...
على فكره انا ضد التعديلات دى جدا لكن فى صالح مين نقاطع الاستفتاء طب منروح ونقول لأ.
موقف المعارضه فى بلادنا غريب موت, احنا لو قاطعنا الاستفتاء هيروحوا أعضاء الحزب الوطنى وحلفاؤهم وتكون الاغلبيه للموافقه.
للأسف موقف المعارضه بيدعم التعديلات الدستوريه حتى لو كانت الحكايه ماشيه ماشيه والدستور هيتعدل هيتعدل باستفتاء أو بدونه. برضه مينفعش نستسهل المقاطعه كده فى كل حاجه لأنها مش جايبه همها مع الحكومه بتاعتنا.
اللى عجبنى فعلا موقف سئيلة الدم كونديليزا رايس. الهانم مش مرحبه بالتعديلات الدستوريه المصريه وبتعرب عن قلقها . وهى ملها بس بالحوار ده كله, ايه اللى حشرها فينا
يلا ولا بلاش....

قصيدة ايمان بكرى عن الدستور بجد وهميه

كل سنه و انت طيبه

كل سنه و مامتى و كل أم فى مصر بخير يا رب و بأحسن حال

اسئله مجننانى

.اسئله بجد نفسى أعرفلها اجابه... محيرانى و مجنناى مووت

1. يا ترى وزير الصحه لما بيتعب بيتعالج فين؟

2. ياترى وزير الداخليه لما حد بيزعله او بيضايقه بيلجأ لمين؟

3. يا ترى وزير الماليه بيقبض كام؟

4. يا ترى اولاد سيادة وزيرة القوه العامله بيشتغلوا ايه؟

5. يا ترى وزير الثقافه بتاعنا بيقضى وقته ازاى؟

6. ويا ترى رئيس الجمهوريه بيدفع زكاة المال بتاعته لمين؟

إحقاقأ للحق

بسم الله الرحمن الرحيم

لا تحسبن الذين قتلوا في سبيل الله امواتاً بل احياء عند ربهم يرزقون، فرحين بما اتاهم الله من فضله ويستبشرون بالذين لم يلحقوا بهم من خلفهم الا خوف عليهم ولا هم يحزنون.

صدق الله العظيم

زى ما أتعودنا على ٍانتقاد بعض رجال الشرطه على اللى بيحصل فى الاقسام وحملة لا للتعذيب وكل الكلام ده, انا حسيت ان فى واحد النهارده لازم كلنا نكرمه لأنه عمل واجبه على أكمل وجه وضحى بحياته فى سبيل أنقاذ فتاه من الأعتداء عليها.

هو الملازم أول/ محمد عبد الكريم المتناوى 24 سنه احد شهداء الشرطه واللى ضحى بحياته فى سبيل اداء واجبه , كان فى كمين على محور المنيب سمع صوت استغاثه بنت من احد الميكروباصات, غيره كتيير أوى حيقولوا وانا مالى, لكن الشهيد قام بمطاردة السياره. المجرمين استمروا فى القياده وحاولوا يهربوا من الشرطه اضطر الملازم محمد لأطلاق الرصاص على ٍاطارات السياره ووقفت فعلاٌ , واحد من المجرمين دول حاول ان ينزع السلاح من محمد لكن رصاصه للأسف خرجت غلط واستقرت فى قلب الشهيد
توفى الشهيد فى نفس اللحظه و قبل اسبوعين من زفافه, رئيس الجمهوريه اصدر قرار بترقية الى نقيب.

انا عن نفسى أتأثرت جدا بالقصه دى وأعتقد ان فى غيرى كتتير اوى اتأثروا بيها برضه, ويكفى ان اكثر من 5000 شخص شيعوا جثمان الشهيد الراحل
ندعوا الله ان يتقبله شهيدا ويسكنه جناته ويصبر أهله.