فوزيه البرجوازيه

ليبرالى ,امبريالى ,برجوازى, شيوعى, يسارى, يمينى
لأ شيعى, ده سنى, ابراهيمى...........
هما كام كلمه كده كل واحد يحب يتنطط على خلق الله يقوم يقولهم حاجه كده زى فوزيه البرجوازيه. و انت امبريالى يله ؟
قلت طب منشوف ايه الحكايه دي؟ مين يعنى كارل ماركس ؟ ولا جيفارا اللى بين يوم وليله كده بقى ابونا الروحى وقدوتنا العليا
قلت مبدهاش بقى احنا نمسكهم كده واحده واحده وبعدين ورانا ايه يعنى ..............

اولا يعنى ايه شيوعيه؟

هى عباره عن مذهب يؤمن بأن الدوله لازم تسيطر على المجتمع بحيث يصبح كل شىء فى الدوله ملكيه عامه يعنى ميبقاش فيه قطاع خاص خالص.
المذهب ده بقى يؤمن ان كل الناس لازم تبقى زى بعض (ازاى مش فاهمه) ميبقاش فيه غنى وفقير كل واحد يبقى معاه قد التانى
اصحاب المذهب ده كانوا شايفين ان ده من شأنه انتشار العداله بين كافة طبقات المجتمع
فى بعض الناس بيسموا الشيوعيه بالماركسيه وده نسبه الى منشىء هذا المذهب وهو كارل ماركس فيلسوف المانى كبير وتلاقى ديما الجماعه المثقفين او الوطنين بيهتفوا بأسمه وبيعتبروه بطل عالمى وحاجات من دى يعنى.

وعلى فكره كمان الشيوعيه هى هى الاشتراكيه يلا اى خدمه

طب ويعنى ايه بقى البرجوازيه دى؟

دول بقى اللى أحنا بنقول عليهم كده كريمة المجتمع يعنى اصحاب الطبقه العليا أو الارستقراطيين وكانوا بياخذوا معاهم كمان اصحاب المهن اللى عندهم القدره على الانتاج والسيطره على المجتمع وموؤسساته للمحافظه على مكانة البلد.
فاكرين عم ماركس بقى اللى اتكلمنا عنه فوق. أخينا ده بقى مكانش بيحب البرجوازيه ولا البرجوازيين ولا طبعا الحاجه فوزيه. كان شايف ان البرجوازيه دى عايزه تقسم المجتمع الى طبقات وده طبعا كان ضد معتقدات كارل ماركس علشان كان بيؤمن بالمساواه زى ما قولنا. انت نسيتوا ولا ايه.

طيب تمام لحد كده... يعنى ايه بقى رأسماليه؟

كلنا عارفين طبعا الثوره الصناعيه اللى حصلت فى العالم. اهى الرأسماليه دى بقى كانت نتيجه للثوره الصناعيه وهى تعتبر عكس الشيوعيه تماما لأنها تؤمن بأن كل واحد من حقه ان يكون ليه أملاك خاصه بيه ومن حقه انه يسعى للتوسع فيها كمان. انا فى رأيي أن ادم سميث وديفيد ريكاردو هما أهم رواد للمذهب ده
مع ان كان فى قبلهم علماء كبار وضعوا اساسات لهذا للمذهب.
على أى حال لحد كده حلو مووووووووت بس للأسف الراسماليه كانت السبب فى ظهور المستعمرات او اللى اطلقوا عليها الغرب امبراطوريات واللى اتعرفت بمذهب الأمبرياليه.
معلش انا عارفه انكوا زهقتووووا منى خالص .

يعنى ايه بقى امبرياليه؟؟

يعنى سياسة توسيع السيطره او السلطه الى البلاد المجاوره. يعنى من الاخر كده الاستعمار.
السبب فى ظهور حركة الاستعمار فى العالم كان تكالب الدول الكبرى ( المفتريه) -زى المانيا وفرنسا سنة 1860 -على الدول الغلبانه فى قارة أفرقيا والى كانت مصر منهم ( يلا ربنا يخدهم)علشان تسرق منهم المواد الأوليه وتستخدمها فى الصناعه وبعدين ترجع تبعها للدول الفقيره باسعار خياليه .

نيجى لحكاية يسارى ويمينى......
يسارى وبدون لف ودوران كتيير يعنى المذهب المخالف للمذهب المتبع فى الدوله
بالله عليكم اوعوا تناموا منى . الحكايه باختصار كده ان مثلا فى الغرب الليبراليه هى المذهب المتبع يبقى الاشتراكيه مذهب يسارى والعكس فى الاتحاد السوفيتى مثلا ده كان اشتراكى يبقى الليبراليه فيه مذهب يسارى. ها وصلت؟
واليمينى يبقى عكس اليساري كده.

طيب بمناسبة الكلام عن اليساريين نتكلم بالمره عن جيفارا بأعتباره اعظم واشهر اليساريين فى العالم....
جيفارا ارجنتينى ولد سنة 1928 فى بداية حياته كان بيدرس فى كلية الطب وكان مصاب بمرض الربو وده كان مرض خطير ساعتها منعه من الالتحاق بالجيش . كان بيؤمن بوحدة امريكا الجنوبيه وكان بينظر لأمريكا باعتبارها دوله مضطهده لدول امريكا اللاتينيه.
حاول القيام بثوره فى زائير بس فشلت لعوامل كتيير كان أهمها اختلاف اللغه. قتل جيفارا فى بوليفيا كان بيحاول تنظيم ثوره على الحكومه هناك. تم القبض عليه بالتعاون مع القوات البوليفيه و المخابرات الامريكيه . بعد اعدامه بخمس سنوات نشرت مذكراته ومن ساعتها و(تشى جيفارا) رمز من رموز الثوار على الظلم والفساد.

طيب ولو ان مش موضعنا خالص لكن بعض الناس ممكن يخلطوا بين شيوعى وشيعى.علشان كده بالمره نشوف ايه الفرق بين الشيعه والسنه ( حاجه كده فوق البيعه يعنى)
السنه: بيمثلوا الغالبيه العظمى لكافة المسلمين وهم بيؤمنوا وانا معهم (والحمد لالله) بالله ورسوله شأنهم شأن الشيعه. بس السنه تفرق عن الشيعه فى أنهم ييقروا بخلافة كل الخلفاء الراشدين :سيدنا ابو بكر و سيدنا عمر بن الخطاب وسيدنا عثمان بن عفان وسيدنا على بن ابى طالب وسيدنا الحسن بن العلى.
الشيعه: ينكرون خلافة كل من سيدنا ابو بكر وسيدنا عمر وسيدنا عثمان ويؤمنون بأن سيدنا على بن ابى طالب كان احق بالخلافه منهم.


على كل حال انا كده خلصت اللى عندى انا عارفه انى طولت عليكم اسفه اوووى. وعلى فكره انا طبعا مش مثقفه اوى كده ولا حاجه الحكايه فعلا ان المصطلحات دى كانت محتاجه نراجعها ونشوف ايه الجديد علشان محدش يتنطط علينا تانى.

اللهم ارزقنا الاخلاص فى القول والعمل.
وجزاكم الله كل خير